MTech CSE ka parivaar

NOTE: This poem is dedicated to all of my dear classmates and Juniors who made those 2 years at IITG memorable. I recited the poem on our farewell (Sayonara’2010) and trust me – everyone was listening attentively which is a rare thing 😀 Gonna miss this life forever…

Sunane ja raha hun ek kavita mahaan,
Sunne wale jara dijiyega dhyaan;
Baaki sab band kar le apne kaan,
ya phir 10 min ke liye ja sakta hai bahar,
Shirshak hai jiska “MTech CSE ka parivaar!”

Doston se dosti ki, ladkiyon se kiya pyaar,
Kiya humne dusre deptt mein bhi apna prasaar;
Physics/Biotech jaise naam hain beshumaar 😛
aur banaya humne hasta khelta failta hua
MTech CSE ka ye pyaar bhara parivaar!

Liye Jazba kuch kar dikhane ka,
Finally ek achi si job pane ka!
Sab ek dusre se bekhabar aur anjaan,
College mein enter hue apni chaati taan;
BTech walo ne kaha “kaun ho meri jaan??”,
Profs ne kaha ho tum sirf 2 saal ke mehmaan,
apna kaam karo ya karo aaram, but
plz hume na karo pareshaan!! 😀
Seniors ne bhi yahi tha samjhaaya,
Padhai likhai to hai sirf moh-maya!
bas mil gaya hume to avsar shaandar,
haste, gaate, khelte hue bana liya
MTech CSE ka mast mast parivaar!

First year ki woh assignments thi insane,
le gayi raaton ki neend aur din ka chain!
Aaye the sochkar ki milegi koi ladki,
but ye kya!, yahan to pehle se hi hai kadki!
Chor (छोड़) diya jiske liye humne hostel ka lunch,
Kurkure, juice, cakes, chips aur munch!
Woh tapri ke pakode, tea and mixture chat,
mann hi mann niharna sundar ladkiyon ki baat (बाट)!
Aasha thi aayega in dhimal aakhon mein prakash,
No offence, but juniors ne bhi kar diya niraash! 🙂
Zara rukiye hazoor, andar se aayi pukaar,
Aakhir ummid par hi to kayam hai ye sansaar!
aur aise banaya,
MTech CSE ka single ladke-ladkiyon wala parivaar!

Lab mein woh project karna to tha sirf bahana,
Kaam tha doston ke saath thoda sa aur batiyana!
Bina brush ke Dosa khana – jab hote hain late,
but kya karen, queue mein karna padta hai
phir bhi ghanton wait!
Mess mein karna rotiyon ki maara maar,
Paneer kha kha kar toot gayi sabra ki diwaar!
Power cut ho jane par woh chikhna chillana,
aur light aane par khule muh pakde jana; 😉
Yahan tak ki humne to dekha rasgullon ka bhi
plate se gum ho jana!!!
Din din tarasna – kab milega ek special meal,
Jab table par Sweets-icecream ki hoti hai deal!
Birthday par khana doston se laat,
Canteen mein jakar laga dena
bechaare ke wallet ki watt!
Kisi ke birthday par kisi aur ko maarne ki dhun,
Gehun ke saath to hamesha pista hi hai ghun! 🙂
Bhulaye kaise bhul sakta hai yaar,
Kamine doston ka woh bumps wala pyaar!
aur aise banaya,
humne MTech CSE ka uchalta koodta parivaar!

Ghar walon se kahna – “Soya nahi poori raat”,
Beta to kar raha tha girlfriend se meethi meethi baat!
Raat ko ek CS ka game, ek movie ya
ek taash ki baaji thi jaroori,
Neend to agle din class mein ho jaayegi poori!
Sona first bench par professor ki naak ke neeche,
Hamare woh oonghna, khilkhilana, masti aur
chitrakaari karna baith kar peeche!
Attendance ka darr bhi kuch logon ko hila na paaya,
Bunk jaise aish-o-araam se apna banvaas bitaya!
Aankh lag jane par woh professor ke chalk ki maar,
aur boring lectures mein hi to panpe ham jaise kalakar! 😉
aur aise banaya
humne MTech CSE ka ye sota jaagta artistic parivaar!

Lo aa gayi imtihaan ki ghadi,
Syllabus ka ata pata nahi aur
kaam ki ek bhi book nahi padhi!
Fursat kahan thi notes banane ki,
Science ne di hai na
machine XEROX karane ki!
Raat raat bhar baith kar ratna,
Apna time bachane ke liye dusro ke
rooms par bhatakna!
Coffee par neend se bhari aankhon ko jagaana,
kya karen, books ke darshan kiye beet gaya zamaana!
Exam wale din bhagwaan ko manana,
ladoo, pede ya rupiyon ki rishvat khilana!
Kuch samajh na aane par ques paper ka palatna,
Ghanton tak chhat (छत) ki diwaar ko takna;
aur help milne ki ummid se aankhon ka matakna!
Dekhi jo hamare maathe par tension ki boond,
Examiner khush ki beta…
ab aaya pahaad ke neeche oont! 😛
Par humne bhi kahan seekha hai maan na haar,
with doston ki help and notes ka vyapaar!
aur aise banaya
MTech CSE ka ye padhne wala nikamma parivaar!

Kaziranga – dumb-charades mein has has kar
ho gaya haal behaal,
“Shamshaan ki kali” aur “Isne isko nahi maara”
jaise naamo ne kar diya nihaal!
Guwahati ki choti par chadhna fudak fudak,
Kuch log to bechare beech mein hi gaye ludhak! 😉
DC ne barbaad karne mein nahi chori koi kasar,
aisi, waisi movies, soaps se aasani se kat gaya
din-raat ka safar!
Akhiri dino mein hard disk ka fill karna,
ek ek slot ke liye lambi lambi aanhen bharna!
Cycle par karna dhoop mein daud-bhaag,
Fotu ke liye lagana beech mein chalaang!
Holi par woh kapdo ka chir haran,
tan dikhate hue phir aati hai sharam!
Sikkim, Shillong ke trips bhi hain yaadgaar,
Barak Canteen ka makeover bhi
kuch kam nahi tha chamatkaar!
Mama ki mithai se manaya
hum sabne Diwali ka tyohaar!
aur aakhirkaar
taiyaar hua MTech CSE ka bhara poora parivaar!

To aaiye meharbaan – kadardaan,
dekhiye kaun kaun hai hamare is
parivaar ki aan, baan aur shaan…

Shirish ka Java pyaar,
PHOKAT Pavan ki woh uchal kood;
PAA ke papers ka bhaar!
Sabko advice dene ki hamari MUMMY
ne rakhi hai thaan!
BAKRI Chandu aur E-Vishal ki woh
har baat par khinchtaan,
Model Anuj hai hamaare LOVE GURU,
ladki dekhte hi ghanti baji — “Guru, hoja shuru”! 😀
“Master of Tech” student Kurup ka chauda Seena,
aur Nahar bhai ka dhai kilo ka haath,
Shantanu ko mila Lord voldemart ka saath!
CHEETAH hamara khoya hua sardaar,
AAM AADMI ke kisson ki bharmaar!
Roopa ki jhuki jhuki si nazar,
Ankur ki kamre jaisi kamar!
Sapna ka first bench par be rok-tok sapne sajana,
Dharam ka har waqt bike pe Girls hostel ke
aas-pass mandraana!
Lopa rehti hain apne mein magan,
aur Prabhat ki woh andhere kamre se lagan!
Shekhar ka chicken girata sabki wicket,
Subrata ko to dekhne ki bhi lagti hai ticket!
Anand aur Ajith ki “Stupid, You Idiot” wali hathapaai,
Sumit Bhaisahab hain hamare DARINDE bhai!
CHOTE BAKAR Santosh ne ga ga kar
ANNA Satheesh ko kya bhayankar Hindi sikhai! 😛
CHACHA ke dil mein kuch kuch hota hai,
Par Kushgra har baat mein kyu rota hai!
Mota BALLU rehta hai life mein hamesha bore,
LOLITA hai batch ka nachta hua safed mor!
Pain (पाइन) ka bhi kuch kam nahi hai josh,
ek aur-ek aur kahkar bhi khote nahi hain hosh!
Bindu ma’am ko khaye ja raha judaai ka gham,
Vinayak aur guide ne kar diya naak mein dam!
DISASTER Vikrant aur uske PJs ke vaar,
“Karthik callling Karhik” ke coding ki dhaar!
Bhagath hai hamara BUFFALO faltu,
Alisha ne banaya tension ko paltu!
khud ko bhi kaise chadhaun chane ki jhaad pe,
Jaane kya kya kaam kiya M.Tech ki aad mein!
Movies dekh dekh kar ho gayi aankhen chaar,
Nach nach kar bhi nahi hili patli kamar si diwaar! 🙂
Ye hai ham sabka do saalon ka saar,
Jahan koi banna hi nahi chahta BR
woh hai hamara
MTech CSE ka innocent sa parivaar!

Itna kuch kah diya Joke joke mein,
Manish to gaya bechaara “literally” bhonk mein!
Lekin ab ho raha hai ahsaas,
jaane ka time aa gaya pass;
Sochte hue mann ho jata hai udaas! 😦
Rah rah kar ab aata hai yaad,
Bitaya hua har woh lamha doston ke saath;
Nahi aayenge wapis wo pal, woh ghante,
woh din, mahine, saal baar-baar!
Lekar baithe hain aansu dil mein bharmaar, 😦
par kya karen hain hum aadat se lachaar;
Wada kar baithe doston se na rone ka yaar,
nibhana to padega warna padegi bahut maar!
SAYONARA kahte hain dil mein liye sapne hajaar,
unme se atleast ek-doso 😉 to honge sakaar!
Juniors se hai guzarish ki rakhen barkaraar,
bilkul hamari tarah…
MTech CSE ka ye sadabahar parivaar!
MTech CSE ka ye sadabahar parivaar!